#حضن_كبير
كل اللي يعرف أبونا كان عارف انه بيحب يحضن ولاده في أي مناسبة . في ليلة العيد لازم يحضن كل شماس ويعيد عليه و اول ما يشوفك في أي وقت لازم يحضنك. حضن تحس فيه الأبوة و الاحتواء و الدفء مش مجرد حاجة روتينية . هو كان عارف ان ناس كتير مفتقدة الحضن دة في حياتها عشان كدة كان على طول مبتسم و فاتح دراعاته للكل.
+ #الخال_والد
ابونا كان خالي بالجسد و هو فعلاً كان اكتر من والد . لما رحت القاهرة انا و اخواتي علشان الجامعة كان دايماً بيسأل علينا و يطمن و يستحمل دوشتنا. كنت كل ما ازوره ارجع محمل بكتب كتير من مكتبته الشخصية اللي كونت تفكيري في الوقت دة . كمان هو اللي جوزني و منساش انه خلاني البس البرنس المميز بتاعه ( الاحمر في ذهبي ) في الاكليل و كان لازم كل سنة في عيد جوازنا يكلمنا و يطمن علينا . و في اي وقت احتاجه في مشورة الاقيه.
+#ساعة_مع_الرب_يسوع
لما كنت صغير و بنزور ابونا كان فجأة تلاقيه دخل اوضته و اختفى شوية و بعدين يطلع وشه منور كدة و عرفت بعد كدة ان ده وقت خلوته اليومية . و لما كبرت أبونا اداني كتيب/نبذة اسمها ساعة مع الرب يسوع – بتشرح ازاي تقضي ساعة كل يوم مع ربنا بكل تركيز ففهمت كان بيعمل ايه . ابونا كان بيتملي من القعدة مع ربنا قبل ما يخدم و يتكلم عنه و ده سر قوة خدمته . و كمان اظن ان دا سر بصيرته في الارشاد . اولوياته واضحة و نابعة من ينبوع الحكمة . +
#اشجع_رجل_دين_في_مصر
فترة الثورة انتشر فيديو لابونا وهو بينتقد بقوة الأوضاع في الوقت ده وكان عنوان الفيديو اشجع رجل دين في مصر . الفكرة أن الفيديو ده مكانش حاجة منفصلة لأن أبونا طول عمره “حقاني” زي ما الانبا يوليوس قال في الجنازة . ابونا كان لا يهاب في الحق زي سيده. وحتى في الامور الروحية مفيش دلع و لا تمييع. الجميل ان كل دة كان بيعمله بوداعة تخليك عمرك ما تزعل منه.
+ #كاهن_مستنير
أبونا كان دائما عنده فكر مختلف و سابق عصره بمراحل . ويمكن ده خلي الشباب تتلم حواليه. مثلاً كنيسة الدمشيرية رغم صغرها كان عندها كاميرات و بث اونلاين قبل كنايس كتير اوي . ابونا برضه من اوائل الناس اللي عملت نهضة العدرا اونلاين لما كان في حظر ايام الثورة – قبل الكورونا بكتير . كمان ترميم الكنيسة و تجديدها باحدث الطرق العلمية . و طبعاً كان مستنير في ارشاداته الروحية من غير تعصب و لا تساهل .
+ #كاهن_حقيقي
كنت مرة باسأله ايه سر قداسة ابونا بيشوي كامل فقالي لأنه كان “حقيقي” (عكس fake) مش بيمثل و لا بيدعي . و ابونا كان كدة – كان عايش المسيح ببساطة و وضوح من غير اجندات خفية و لا اهداف تانية غير خلاص النفوس. أبونا كان كاهن “حقيقي” و عشان كدة ناس كتير شافت فيه المسيح و قربت منه .
+ #the_special_one
فيه كاهن حنين و في كاهن حكيم و في كاهن مسبح و في كاهن طقسي و في كاهن معلم و في كاهن مرشد و في كاهن متفتح و في ابونا يوحنا اللي بيجمع دة كله و دة اللي مخليه كاهن نادر تلاقيه . كلنا هنفتقد ابونا و كلامه و حضنه و ارشاده بس حبه و تعليمه و روحه الجميلة هتفضل معانا لحد ما “نروح السما معاه” زي ما كان دايماً بيقول . انا نفسي اولاده و احباءه يكتبوا في التعليقات مواقف او تعاليم لابونا علشان نقول مع الرسول : “”اُذْكُرُوا مُرْشِدِيكُمُ الَّذِينَ كَلَّمُوكُمْ بِكَلِمَةِ اللهِ. انْظُرُوا إِلَى نِهَايَةِ سِيرَتِهِمْ فَتَمَثَّلُوا بِإِيمَانِهِمْ.” (عب 13: 7).” ربنا يدينا كلنا تعزية وينفعنا بصلواته عنا